官方微信 官方微博
當前位置: 四方快遞 > 雲山論劍 > 正文

老字號“藝苑”

信息時報 | 阿六 | 2020-05-17 22:39:34

白話廣州


  最近,一則市二宮藝苑歌舞廳拆除嘅消息,引起好多廣州老街坊嘅關注。

  藝苑歌舞廳始創於上世紀80年代,算得上系廣州一間老字號歌舞廳。

  上世紀80年代初期,市民嘅夜生活開始興起跳交誼舞,因應呢種需求,好多地方都開咗舞廳,其中包括市一宮、市二宮、市三宮、青宮等“宮”字單位。

  市二宮地處河南,喺嗰個年代,相對於喺正中心區嘅另外三“宮”嚟講,地頭比較偏。但偏有偏嘅優勢,就係地方多,所以市二宮將一棟原先兩層高嘅大樓改成舞廳,面積超過一千平方,成為全市最大嘅舞廳。

  喺建築方面,“藝苑”仲有一個特色,就係門口嘅燈飾設計,日頭睇冇乜特別,但到晚黑一開燈就似一隻孔雀喺度開屏。

  藝苑歌舞廳雖然個名有個“歌”字,但主要系跳舞,系廣州最出名嘅舞廳之一,喺嗰度跳舞嘅人當中不乏“舞”林高手,其中有一男一女(兩公婆)仲攞過全國跳舞十項全能季軍。

  隨住時代嘅變化、需求嘅變化,廣州呢類舞廳宜家已經執得七七八八,“藝苑”屬為數唔多可以捱到今時今日嘅喇,所幸嘅系,呢次拆除只系重新改建,亦即系講,“藝苑”以後可以舞照跳,“孔雀”晚黑照開屏。


  ◎阿六 律師


信息時報社地址:廣東省廣州市廣州大道南83號匯美商務中心四樓

信息時報社 版權所有(C) 粵ICP備14002173號-1 爆料電話:020-34323111 QQ:800023111 官方微博:@ 信息時報

舉報及投訴電話:(020)34323133 郵箱:xxsb_gz@163.com

網上有害信息舉報專區